Arjun Bhagat – (અર્જુન ભગત)
Gujarati
શ્રીહરિનું નાનુ વચન લોપાય તો પણ મહદ્ વચન લોપાય એવા આજ્ઞાનુસંધાનના આગ્રહી ભક્તરાજશ્રી અર્જુન ભગત દાસાનુદાસ થઈને સત્સંગના ઈતિહાસમાં સેવકનો આદર્શ પ્રસ્થાપિત કરી ગયા છે. તેઓ દાદા ખાચરની ગાયો-ભેંસો ચરાવવાની સેવા કરતા.
અર્જુન ભગતના જીવન વિશેની એક જ વાત એવી જાણવા મળી છે કે સત્સંગી માત્રને પ્રેરણા લેવા જેવી છે. એક સમયે અર્જુન ભગત ગાયો ચરાવતા હતા ત્યાં અચાનક એક દીપડાએ ગાય ઉપર હુમલો કર્યો. ત્યારે આ સહજાનંદી સિંહે ગાયને બચાવતા દીપડાં પર વાર કર્યો. મોટો પથ્થર લઈને માથા પર ઘા કર્યો અને ત્યાં જ દીપડો મરી ગયો. ત્યારે તેમને આનંદને બદલે દુઃખ થયું. તેમનું હૈયું કંપી ઉઠ્યું. શ્રીહરિએ તો મચ્છર સરખા જીવની હિંસા કરવાની પણ ના પાડી છે ને મારાથી તો આ અતિ મોટા જીવની હિંસા થઈ ગઈ. મે અતિ મોટુ પાપ કર્યું છે. આમ માનીને મૂંઝાઈ ગયા.
આ પોતાની ભૂલનું પ્રાયશ્ચિત લેવા તેઓ સ્વયં શ્રીહરિ સામે હાથ જોડીને ઉભા રહ્યા અને દર્દ ભર્યા સ્વરે પોતાની ભૂલની કહાની કહીને પ્રાયશ્ચિતની માંગણી કરી ત્યારે શ્રીજી મહારાજ અતિ રાજી થયા અને કહ્યું તમે હિંસક પ્રાણીથી ગાયની રક્ષા કરી છે તે અતિ મોટા પુણ્યનું કામ કર્યુ છે. આમ કહીને શ્રીહરિએ તેમને થાળની પ્રસાદી આપીને શોક દૂર કર્યો.
આવા હતા એ ભક્ત રાજ. તેમના જીવનમાં તેમણે એક પણ શ્રીહરિની આજ્ઞાનો લોપ થવા દીધો નથી. અર્જુન ભગત વરતાલ મંદિરની પ્રતિષ્ઠા વખતે શ્રી હરિની માથે છત્ર લઈને સતત સેવામાં રહેલા.
ધન્ય છે આવા આજ્ઞા પાલક ભક્તોના જીવનને…